Cekhita Lappung - Nasihat Mehayu: Jukuk Jak Tetangga Tenah-han Lebih Hujau.Tulisan: Mang Kumir *)

nataragung.id - Teginenong - Pagi mehayu di-khani Ahad tekhasa sejuk nihan. Sekhadu begawi Sakai-sambayan ngedawakko lingkungan, pikha-pikha jelema sing-ngah di wakhung kupi Bu Ijah. Secak-kekh kupi halom khik putti gukhing jadi khik bekicik'an. Anjak ngebalah ko sai happang-happang, tiba-tiba balahan mehili guk tema sai khadik jama kehukhi'an kaban kha-gah.

Ahmad umokh 45 tahun, ngalah-ngaduh, ngehela hang-ngas tijang suwa cawa. "

"Pusing nihan nyak weh, lamon diajak kebayan guk pasakh. Susah temon ngejaga pengenahan."

Anwar sai mejjong di sapping ni ngangguk suwa nyengih pahik menimpali. " Layin cuma guk pasakh, Mad. Dipa-dipa gegoh-gawoh. Di mall, di halte, di parkiran, malahan di ngan olahraga. Khasa ni mata sa tekhus di uji."

Sanusi sai paling tuha nutuk bebalah.

" Yu, haga gohpa lagi. Zaman kak gohiji. Dipa-dipa aurat ditut-tunko. Picawi solusi ni Ustadz?"

Anjak jeno Ustadz Munawar cuma nengisko gawoh. Beliau ngeppik ko cakkekh kupi ni suwa cawa lalun.

"Allah khadu nyediakon khanglaya luwah ni. Sai pertama, tundukkon pengenahan."

Beliau tekhus ngebaca ko firman Allah:

«قُلْ لِلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَٰلِكَ أَزْكَىٰ لَهُمْ ۗ إِنَّ اللَّهَ خَبِيرٌ بِمَا يَصْنَعُونَ

Khat-ti ni: "Cawako jama kaban kha-gah sai beriman tagan tiyan menunduk ko pengenahan tiyan khik ngejaga kemaluan tiyan. Sai gegoh na lebih suci bagi tiyan. Sesungguh ni Allah Maha mengetahui api sai tiyan kekhaj-ja ko." (QS. An-Nur: 30).

Lamun mak sengaja mata ngenah sai hakham. Dang di ulang. Geluk lingos ko pudak anjak ngenah ni, nayah-nayahko istighfar."

Beliau tekhus ngebacako hadist Rasulullah shalallahu alaihi wasallam:

«يَا عَلِيُّ لَا تُتْبِعِ النَّظْرَةَ النَّظْرَةَ…»

Khat-ti ni: "Wahai Ali, dang niku nutuki pengenahan mu sai pertama jama pengenahan bekhikut ni. Pengenahan pertama di mah-haf ko, sedongko sai ke-khua jadi tanggung-jawab mu." (HR. Abu Dawud khik Tirmidzi)

"Tekhus geluk-geluk ingok wat kebayan mu di mahan."

Beliau tekhus ngebacako hadits Jabir radhiyallahu 'anhu tentang Rasulullah ﷺ sai mulang ngekhatongi kebayan ni ketika khatong kege-khingan ni jama bubay bakhih, tekhus bersabda:

"Mula lamun wat diantakha kuti ngenah bubay tekhus luwah kege-khingan, hendaklah ia ngekhatongi kebayan ni, ulah sai demikian ina dapok ngelebonko gejolak sai ngedok delom dikhi ni." (HR. Muslim no. 1403).

Ahmad ngekuy hulu ni suwa sengah-sengih.

"Nah…, sina lah masalah ni, Ustadz. Api sai wat di mahan ternyata bida jama sai wat di khanglaya. Sai di luwah tenahan lebih bening."

Sanusi lalang lalun.

"Ha-ha-ha…. sangun temon, Ustadz. Jukuk tetangga sangun ge-khing tenahan lebih hujau."

Ustadz Munawar nyengih bijak.

"Sinalah tipu daya belis. Belis selalu ngehias bakhang sai layin jak kham, tagan tenahan lebih hallaw. Padahal sai halal jawoh lebih ngusung ketenangan anjak sai hakham.

Beliau tekhus ngebacako firman Allah:

وَلَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ زَهْرَةَ الْحَيَاةِ الدُّنْيَا

Khat-ti ni: "Dang niku nunjuk ko pengenahan mu jama kenikmatan sai kak Ikam juk ko jama pikha-pikha golongan diantara kuti sebagai bunga kehukhi'an dunia." (QS. Thaha: 131)

Anwar nutuk nyappai ko isi hati ni. "Yu Ustadz…
andai kebayan-kebayan Ikam munih faham. Ikam mekhattok tiyan tampil rapi, mekh-khum, mukhah senyum, bangik di ten-nah. Layin guway kha-gah bakhih, tapi guway mengiyan ni pesai."

Ahmad langsung nim-mbal suwa lalang.

"Hahaha…, temon cawa jelema Pelim-mbang, 'wat khupa wat khag-ga.' Siap awat Pak Anwar ngebeliko skincare, baju hallaw, minyak mekh-khum jama kebutuhan layin ni?"

Unyin sai ngedok di wakhung lalang.

Ustadz Munawar nutuk nyengih. Tekhus cawa. "Nah… sina munih tanggung-jawab mengiyan."

Beliau tekhus ngebacako hadist:

خَيْرُكُمْ خَيْرُكُمْ لِأَهْلِهِ، وَأَنَا خَيْرُكُمْ لِأَهْلِي

Khat-ti ni: "Sebetik-betik ni kuti adalah sai paling betik jama keluarga ni, Nyak adalah ulun sai paling betik jama keluarga ku." (HR. Tirmidzi)

"Ngeguway kebayan ngekhasa di khag-ga'i, dibahagiako, dijuk nafkah sai betik, kaway sai layak, perhatian, kasih-sayang, ina bagian anjak akhlak mengiyan."

Beliau tekhus ngelanjutkon.

"Tapi ingok, kebahagiaan rumah tangga mak ditegi ko hanya jama pudak sai sikop atau kaway sai hallaw. Sai paling penting ialah syukur. Dang sibuk ngitung kekukhangan pasangan, tapi nayah-nayahko ingok kelebihan ni. Sebab mak ngedok jelema sai sempurna."

Beliau tekhus ngebacako hadits Rasulullah shalallahu alaihi wasallam :

لَا يَفْرَكْ مُؤْمِنٌ مُؤْمِنَةً، إِنْ كَرِهَ مِنْهَا خُلُقًا رَضِيَ مِنْهَا آخَرَ»

Khat-ti ni: "Dang lah ulun mukmin ngebet-ji kebayan ni. Lamun ia mak ge-khing sai kelakuan ni, tattu wat kelakuan ni sai bakhih sai di ge-khingi ni." (HR. Muslim)

Suasana jadi hening. Masing-masing hanyuk delom renungan.

Matakhani tam-mbah khang-ngal. Han-ndop ni mulai te-khasa. Cak-kekh kupi khadu kosong. Unyin tiyan pekhadda salaman, tekhus mulang guk mahan masing-masing.

Dihati tiyan tetanom sai pelajakhan:

Jukuk tetangga sangun tenahan lebih hujau ulah ditinuk anjak jawoh. Tapi jukuk di tekhabbah mahan pesai, jawoh lebih hallaw lamun di rawat jama khasa syukur, kasih-sayang khik ketakwaan guk Allah Subhanahu wa Ta'ala. (*)

? H. Komiruddin Imron, Lc
✒️Shabahul_Khair
? Cekhita Lappung

*) Penulis adalah Anggota Majelis Pertimbangan Dewan Dakwah Islam Indonesia Propinsi Lampung, tinggal di Pemanggilan, Natar.